Testar nasjonal satsing for å få fleire digitale eldre

Kommunane Fjord, Ulstein og Volda har inngått ein avtale med Senteret for eit aldersvennleg Noreg om å prøve ut nye tiltak for å få fleire eldre digitale. Målet er å utvikle løysingar som kan gi stor effekt og som kan rullast ut i heile landet.

– Dette har vi verkeleg sett fram til å få i gang, seier Nina Myklebust, fungerande leiar i Senteret for eit aldersvennleg Noreg.

– Vi er svært nøgde med å ha fått med oss desse tre kommunane på Sunnmøre i utprøving av nye måtar å få fleire eldre meir digitale. 

Nina fortel at med bidrag gjennom desse pilotane, i tillegg til dei tiltaka som alt er i gang i kommunane, er ønskje å vekkje interesse både hos dei som ønskjer å bli betre til å bruke smarttelefon og datamaskin, og dei som enno ikkje har kasta seg ut i det digitale livet.

– Det er aldri for seint!

Kartlagt kva tilbod som finst

Senteret er ein del av Helsedirektoratet og lokalisert i Ålesund. Derfor betyr det mykje at det er kommunar i vår region som deltek i pilotane. 

Sidan senteret fekk i oppdrag frå regjeringa å bidra til at fleire eldre blir digitale og i større grad greier seg sjølv, er det gjennomført ei omfattande kartlegging.

– Det har vore viktig for oss å finne ut kva tilbod som finst, kva som fungerer, og ikkje minst kva folk sjølv ønskjer seg, forklarar Nina.

Opplæring i heimen 

Mange vegrar seg for å delta på kurs i grupper. Samtidig veit vi at fleire har utfordringar med å komme seg til stader der opplæring og aktivitetar blir tilbydt. Mange uttrykkjer ønskje om å få hjelp heime. Dette blir eit sentralt element i pilotprosjektet. 

– I tillegg til å teste digital opplæring heime, skal pilotane også omfatte ein felles møteplass for opplæring, hjelp, spill og sosiale aktivitetar, forklarar Nina.

Senteret utviklar eit eige kursopplegg med pedagogisk tilrettelagt materiell i samarbeid med Kakadu - eit norsk teknologiselskap som lagar digitale rettleiingar for folk som slit med digitale tenester. 

– Videre vil det bli og bli høve til å låne nettbrett med seg heim, slik at ein kan øve i eige tempo utan å måtte investere i eige utstyr, fortel Nina.

Tiltaka er retta både mot dei som i dag ikkje er digitale, og mot dei som kan litt, men som strevar med enkelte oppgåver. 

Mange heng ikkje med 

Noreg har som mål å bli verdas mest digitale land innan 2030. I dag er ein av ti innbyggjarar ikkje-digitale eller svakt digitale, og størsteparten av desse er eldre.

– Den raske digitaliseringa i samfunnet gjer det krevjande for mange eldre å henge med. Digital kompetanse og tilgang til digitale hjelpemidlar er viktig for å kunne delta i en stadig meir digitalisert kvardag, avsluttar Nina.