Senior Norge blir partnar i arbeidet for eit meir aldersvennleg Noreg

Med eit felles engasjement for fremme eit inkluderande og aldersvennleg samfunn og løfte seniorkrafta, ligg alt til rette for eit godt samarbeid når Senior Norge blir partnar med Senteret for eit aldersvennleg Noreg.

– Som ein stor og landsdekkjande organisasjon med lokallag fleire stader, når Senior Norge breitt ut og har eit sterkt nærvær i lokalsamfunna. Engasjementa deira for å få bukt med mellom anna aldersisme og løfte fram ressursane i den eldre befolkninga er i tråd med arbeidet for eit meir aldersvennleg samfunn, seier Nina Myklebust, ansvarleg for partnarskapsordninga i senteret.

– Vi ser stor verdi i samarbeidet med senteret. Vi treng råd, støtte og fagleg påfyll for å nå måla våre. Og gjennom praksisnære erfaringar og brukarinnsikt ønskjer vi å bidra til utviklinga av eit aldersvennleg samfunn, seier Siri M L Joli, dagleg leiar i Senior Norge. 

Jobbar breitt med store ambisjonar

Som ein politisk uavhengig interesseorganisasjon jobbar Senior Norge breitt for å styrkje rolla til seniorane og deira vilkår i samfunnet. Dei jobbar både inn mot stortinget, regjeringa, departement og forskingsmiljø. Og samarbeider med ei rekkje andre organisasjonar og verksemder.

– Senior Norge er rik på ambisjonar og tek sikte på å dekkje store og vide arbeidsfelt, fortel Siri.

Både arbeidsliv, frivilligheit, bustad, transport og digital inkludering er noko av det som står på dagsordenen. Det gjer også arbeidet for å endre haldningane til alder og aldring. Det å anerkjenne seniorane som verdifulle ressursar er ein sentral del av arbeidet for eit meir aldersvennleg Noreg.

– Aldersisme og aldersdiskriminering er eit av kjerneområda våre. Det gjeld både på arbeidsplassen og i samfunnet generelt, og vi bidreg i fleire samanhengar med å påverke til meir realistiske og gode haldningar i staden for fordommar og vankunne om kva ressurs gruppa over 50 år har, seier Siri.

Sosiale møteplassar

Senior Norges lokallag er også aktive i lokalsamfunnet og bidreg mellom anna til å skape sosiale møteplassar for eldre.

– Lokallaga våre legg til rette for sosiale og informative møteplassar for eldre og deltek aktivt i kommunalt arbeid og i det frivillige, seier Siri.

Lokallaga vel sjølv saksområde og tema for møteplassane. Og Siri fortel om alt frå filmkveldar, til temamøte om seniorar i arbeidsmarknaden og informasjonsmøte i samarbeid med kommunar.

– Det er fleire lokallag på trappene og vi gler oss enormt til å halde fram dette arbeidet, avsluttar ho.