Sandnes er nytt medlem i WHO sitt aldersvenlege nettverk

No er det klart at Sandnes kommune er teke opp som medlem i Verdas helseorganisasjon (WHO) sitt Globale nettverk for aldersvennlege byar og lokalsamfunn.

Sandnes er allereie medlem i det norske nettverket og har fått hjelp til søknadsprosessen av Senteret for eit aldersvennleg Noreg – som er samarbeidspartnar i WHO sitt nettverk.

– Vi er veldig glade for å bli ein del av dette fellesskapet. Gjennom nettverket får vi ny kunnskap og erfaringar frå heile verda. Samtidig ønskjer vi å bidra med våre eigne erfaringar og tiltak – både dei vi har prøvd ut og dei vi planlegg – slik at vi saman kan utvikle gode løysingar, seier Elisabeth Øverland, fagleiar i Fagstab Helse og velferd i Sandnes kommune.

– At vi blir fleire eldre gir både utfordringar og moglegheiter, og vi ønskjer å vere proaktive i arbeidet med å skape eit inkluderande og berekraftig samfunn for alle aldersgrupper, legg ho til.

Aldersvennleg er godt forankra i planverket til kommunen

I 2021 starta kommunen prosjektet Sandnes blir eldre for å møte den forventa veksten i talet på eldre innbyggjarar. Som ein del av dette prosjektet vart det utvikla ein eigen handlingsplan knytt til aldersvennleg samfunn.

− Handlingsplanen har tiltak innan samfunnsplanlegging, møteplassar, frivilligheit og samarbeid med lokalt næringsliv, fortel Elisabeth.

Kommunen har ei tydeleg satsing på å utvikle eit aldersvennleg samfunn, og arbeidet er også forankra i kommuneplanen for 2023–2038. Der er eit av hovudmåla er at «Sandnes skal vere eit inkluderande og mangfaldig samfunn».

− Dette inneber mellom anna å skape gode og tilgjengelege nærmiljø og møteplassar som fremjar tryggleik, tilhøyrsel og identitet for alle aldersgrupper, fortel Elisabeth.

Ei anerkjenning av arbeidet

Sandnes er den fjerde norske kommunen i Noreg som sluttar seg til det globale initiativet. Stavanger, Oslo og Trondheim er allereie medlemmer.

− Som medlem av WHO sitt nettverk vil Sandnes ha høve til å samarbeide med andre byar og lokalsamfunn over heile verda for å utveksle beste praksis og løysingar som adresserer utfordringane og behova til ei aldrande befolkning, fortel Anne Berit Rafoss i Senteret for eit aldersvennleg Noreg.

Ho understrekar samtidig at det globale nettverket ikkje berre er for dei store kommunane her til lands. Det globale nettverket har medlemmer i alle storleikar, at frå mindre kommunar med rundt 1300 innbyggjarar til dei store millionbyane.

− Eit medlemskap i det globale nettverket betyr anerkjenning av det aldersvennlege arbeidet i kommunen så langt, samtidig som det skaper forplikting, men ikkje minst motivasjon til å halde fram det gode arbeidet, avsluttar Anne Berit.