Nye roller i Senteret for eit aldersvennleg Noreg

Wenche Halsen går over i ny rolle i Senteret for eit aldersvennleg Noreg. Seniorrådgivar Nina Myklebust trer inn som fungerande leiar.

Etter snart fem år som leiar går Wenche Halsen over i ny stilling som spesialrådgivar i Senteret for eit aldersvennleg Noreg. Fram til hausten 2026 blir Nina Myklebust fungerande leiar.

– Eg har hatt gleda av å vere leiar for senteret sidan start i februar 2021. Det har vore ein fantastisk fin jobb med eit viktig samfunnsoppdrag og dei absolutt beste medarbeidarane ein kan tenkje seg. Valet om å ta steget ut av leiarrolla er eit eige val og eg gler meg til å halde fram med å jobbe med dei store prosjekta vi har i senteret, seier Wenche.

– Wenche sit på verdifull erfaring og kompetanse, og vi er glade for at ho framleis ønskjer å jobbe i senteret som spesialrådgivar. For å sikre kontinuitet i senteret sitt arbeid, er vi samtidig glade for at Nina har takka ja til å fungere fram til ny leiar er på plass, seier Øyvind Giæver, avdelingsleiar i Helsedirektoratet.

Nina, som er utdanna siviløkonom med spesialisering i strategi og leiing, har vore tilsett i senteret i fire år. Ho har blant anna hatt ansvaret for utvikling og oppfølging av senteret si partnarskapsordning, noko ho også skal ha i det vidare.

 – Eg skal framleis jobbe tett med partnarane våre, men får no også andre spennande oppgåver i senteret. Vi er ein veldig engasjert gjeng som skal bidra til ei endå meir aldersvennleg samfunnsutvikling, så dette ser eg verkeleg fram til seier Nina.