Norske kommunar med i nordisk forskingsprosjekt for aldersvennlege lokalsamfunn

Eit nytt nordisk forskingsprosjekt skal undersøkje samspelet mellom ulike aldersvennlege bumiljø og helse- og omsorgstenester. No er det klart at også norske kommunar får midlar til å delta i forskinga.

Prosjektet «LOCALCARE» undersøkjer korleis strategisk kommunal leiarskap kan bidra til meir aldersvennlege lokalsamfunn. Målet er å utvikle kunnskap om korleis kommunar i Norden kan fremme aktiv aldring og tilby berekraftige omsorgsløysingar – i tett samarbeid med lokalsamfunna.

Frå Noreg deltek Bærum og Iveland kommunar i prosjektet, som leiast av Nordregio og blir finansiert av Nordforsk. Kommunane skal bidra med innsikt i korleis lokale avgjerder og samarbeid påverkar eldre innbyggjarars livskvalitet og moglegheiter for deltaking. 

Aldersvennleg i praksis

Prosjektet tek utgangspunkt i at kommunane speler ei nøkkelrolle i å forme kvardagen til eldre. Gjennom casestudiar og samarbeid med lokale aktørar skal forskarane kartleggje korleis kommunar kan utvikle tenester og tiltak som støttar aktiv aldring – og samtidig handtere utfordringar knytt til demografi og ressursar.

Ved å samanlikne ulike tilnærmingar og erfaringar på tvers av land, håpar prosjektet å identifisere gode modellar for aldersvennleg utvikling som kan komme heile Norden til gode.

Prosjektet vil utvikle konkrete verktøy som kommunane kan bruke i arbeidet sitt, mellom anna:

• Indikatorar for aldersvennlege bustadtypar som inkluderer helse- og omsorgselement
• Eit «aldersvennleg kompass» for utvikling av gode nærmiljø
• Innsikt i korleis kommunar kan styre strategisk mot meir inkluderande og berekraftige lokalsamfunn

Les meir om prosjektet LOCALCARE her (Nordregio.org)